【旅遊趣聞】長此下去,香港可望成為暗黑旅遊的熱點⋯⋯
【旅遊趣聞】長此下去,香港可望成為暗黑旅遊的熱點⋯⋯

去異地旅行,尢其係去一啲少遊客嘅地方,你會發現其實唔係好多人「認識」香港。如果遇到一啲聽過香港嘅當地人,佢哋好可能會擺出想同你打交嘅姿勢,仲會不斷講 “Bruce Lee”、 “Jacky Chan” (只有香港人知道成龍其實唔揪得)。如果有機會深入一啲傾計,佢哋可能會問你:「香港係咪好多黑社會?」「香港人係咪食食吓飯都會打交?」

 

「香港喺咪好多黑社會?」我真係唔識答,可能黑警多過黑社會。

 

點解佢哋會咁諗呢?

 

原來佢哋睇好多香港啲功夫片同古惑仔電影。

 

考考你,黑社會電影𥚃面,古惑仔講親數,除咗喺大酒樓包房外,去得最多嘅食肆係邊度?

 

你有三秒鐘時間諗。

 

滴答⋯⋯滴答⋯⋯滴答⋯⋯

 

答案係:打邊爐嘅地方(最熱門係九龍城方榮記)

 

電影入面,啲古惑仔打打吓邊爐,就會反枱,然後互劈。𠵱啲畫面搞到外國人以為香港人經常劈友,好唔安全。原來大多數外國人都係透過港產片嚟認識香港。

 

不過,香港自反送中運動開始,外國人對香港嘅認識就多好多,示威、遊行、連儂牆、人縺、靚到不得了嘅海報、多國語言嘅文宣(當然也有不少暴力場面)。一幕幕通過各種媒體傳遍世界;多得小粉紅喺世界各地曲線助攻,香港嘅逆權運動的消息成功衝出國際。近日,由於局勢動盪,示威活動頻繁,香港旅遊業的生意一落千丈。不過,多得政府一眾高官嘅英明領導,加上差人鎮「暴」嘅決心,香港旅遊業已喺不知不覺間開始轉型。

 

近日,外國好多搞開暗黑旅遊嘅旅行社開始積極籌辦旅行團,帶領遊客嚟香港,感受一下乜嘢叫催涙彈放題,仲有水炮車、胡椒噴霧、布袋彈、橡膠子彈,甚至真槍實彈,簡直係兵荒馬亂。

 

乜嘢係「暗黑旅遊」?根據旅遊學者Richard Sharpley嘅研究,只要跟死亡、災難、戰爭、毀滅有關聯的旅遊活動,都屬於「暗黑旅遊」的範疇。(The Darker Side of Travel: The Theory and Practice of Dark Tourism)(暗黑旅遊有相當多嘅道德問題,但並非本文嘅討論範圍)。

 

德國電影Keiner liebt mich (No Body Loves Me;港譯《情來自有方》)嘅女主角Fanny即將步入三十歲,佢經常自嘲:「女人三十,中飛彈易過搵男人。」咁講似乎太誇張。但今時今日嘅香港,如果話「中催淚彈同水炮易過搵對象」,就一啲都唔誇張喇啩!

 

[配圖出自Sam Tsang (SCMP)]

關閉